戴巴拿2次助攻　羅馬贏得救命3分

周一(2日)凌晨意甲，羅馬及時反彈，憑保羅戴巴拿貢獻2次助攻，主場以2比0擊敗費辛隆尼，結束連續2場失分頹勢，令近期備受下台壓力嘅教練摩連奴可以暫時鬆一口氣。

羅馬今季開局不順，過去2場聯賽對住弱隊都失分，分別打和拖連奴1比1，上仗更加以1比4大敗於熱拿亞腳下，不禁令人聯想起「摩三季魔咒」再次應驗，皆因摩連奴過往教1支球隊第3季就出事，今仗對費辛隆尼勝負影響「寸王」去留。

幸好羅馬球員將士用命，有出色表現，上半場21分鐘，保羅戴巴拿傳畀盧卡古冷靜射入，呢位比利時前鋒近4場聯賽上陣入3球，證明摩連奴向車路士借用佢，決定非常正確。

戰至83分鐘，保羅戴巴拿開出罰球，羅倫素柏歷堅尼近門窄角度射成2比0，奠定勝局，今季7場聯賽取得2勝2和3負。

保羅戴巴拿貢獻2次助攻成為贏波功臣，賽後摩連奴表示，呢位阿根廷國腳狀態不足，由於今仗非勝不可，冒險焗住派佢上陣，身體負荷已到極限，所以周五(6日)凌晨歐霸盃主場對塞維特，將會收起保羅戴巴拿。