悲哀！夏薩特淪落到要踢「元老賽」

比利時球星夏薩特今夏離開皇馬之後，仍然未有球會收留，根據法國《隊報》爆料，呢位中場即將復出，但只係踢慈善賽，同迪甘斯、白蘭斯等超過50歲嘅名宿做隊友，網民紛紛慨嘆32歲嘅夏薩特已經淪落到要踢「元老賽」。

今場慈善賽將於10月18日喺法國舉行，夏薩特將為一支名為Varietes Club de France嘅球隊上陣，呢支球隊1971年成立，目的係雲集一班球壇名宿踢慈善賽，每年大約踢40場。夏薩特今次獲邀加入，同多位曾經奪得世界盃冠軍嘅名將做隊友，包括54歲嘅迪甘斯、57歲嘅白蘭斯，2人球員時代曾協助法國奪得1998年世界盃冠軍。

睇番38歲C朗、36歲美斯現時仍然保持勇態，反觀32歲嘅夏薩特已經要踢「元老賽」，實在令人唏噓。不過，夏薩特曾經透露可能會掛靴，或者心境上已經屬於「元老級」。