【官宣】耶馬續約至2026年　人工暴增

巴塞隆拿正式宣布同16歲前鋒耶馬續約至2026年，並增設10億歐元(約82億港元)毀約金條款，以防被其他大球會挖角。呢位西班牙國腳人工暴增，由原本大約70萬歐元(約570萬港元)年薪，大幅增加至300萬歐元(約2,460萬港元)年薪，對於陷入財困嘅巴塞而言，已經非常大手筆。

耶馬今年4月喺西甲首次上陣，以15歲零290日成為巴塞隆拿史上最年輕披甲球員，今季迅速上位，奠定主力地位，更加晉身西班牙大國腳，並於上月歐國盃外圍賽對格魯吉亞，射入1球，以16歲零57日成為西班牙國家隊史上最年輕入波球員。上仗西甲，耶馬又有佳作，頭槌二傳令到一代名將沙治奧拉莫斯擺烏龍，協助巴塞隆拿以1比0擊敗西維爾。

因此，巴塞隆拿管理層急不及待同耶馬續約，但因為年齡限制，現時只可以續約至2026年，等耶馬年滿18歲之後，會方將同佢續約至2030年。耶馬續約後話，感覺非常夢幻，但自己年紀仲細，要繼續向隊友學習。