歐聯旺反勝！基沙文倒掛率馬體會贏波

歐聯分組賽第2輪結束，16場比賽有唔少峰迴路轉賽事，包括8場出現絕地反勝嘅場面，創下歐聯史上單輪最多「反勝」紀錄。馬德里體育會周四(5日)凌晨喺歐聯E組，主場兩度落後下3比2反勝飛燕諾，終止連續6場歐聯不勝頹勢。

馬體會自2022年9月後，超過1年未試過喺歐聯贏波，今場7分鐘就有馬里奧靴莫素擺烏龍落後，5分鐘後艾華路莫拉達追平，但34分鐘再被客隊入波，好在基沙文完半場前亂軍中倒掛勾入，半場踢成2比2平手。換邊後2分鐘艾華路莫拉達再入1球，馬體會之後堅守城池，保住3比2勝果。

E組另一場亦係反勝，些路迪主場12分鐘入波領先，但最終1比2不敵拉素；G組薩克達先輸2球下，作客3比2反勝安特衛普。連同周三(4日)嘅朗斯、加拉塔沙雷、拜仁慕尼黑、布拉加同皇家馬德里，今輪歐聯分組賽出現破紀錄嘅8場「反敗為勝」戲碼。