韋斯咸挫弗賴堡創紀錄　歐戰17場不敗威過曼城

韋斯咸周五(6日)凌晨喺歐霸盃A組，作客2比1擊敗德甲嘅弗賴堡，成功改寫英格蘭球隊嘅歐戰歷史！韋斯咸已經連續17場歐洲賽保持不敗，超越1968年嘅列斯聯、1972年嘅熱刺同埋依家嘅曼城，創下英格蘭球隊歐戰最長不敗紀錄。

上屆歐協聯盟主韋斯咸，今屆「升呢」踢歐霸一樣得心應手，今仗作客弗賴堡開波8分鐘就由盧卡斯柏基達先拔頭籌，雖然弗賴堡換邊後由路蘭沙拉爾追平，但阿古特66分鐘接應角球頂入，就幫韋斯咸贏2比1，喺A組兩戰全勝排榜首。

韋斯咸上屆喺歐協聯以14勝1和不敗成績捧盃，今屆歐霸盃2場分組賽亦贏晒，歐戰17場不敗(16勝1和)走勢創下英格蘭球隊紀錄，踢緊歐聯嘅曼城目前不敗走勢係16場，兩隊今屆歐洲賽事將「隔空」鬥法。韋斯咸領隊莫耶斯賽後表示：「創不敗紀錄當然開心，但更重要嘅係贏波，呢3分對我哋爭出線非常重要。」