白禮頓絕地入波　搶歐戰第1分保出線希望

周五(6日)凌晨歐霸盃B組，英超勁旅白禮頓喺落後2球劣勢下，絕地反擊作客2比2逼和馬賽，拎到球會史上歐洲賽事第1分。白禮頓喺被視為「死亡之組」嘅B組排包尾，不過同榜首亦只係相差3分，仍然保住出線希望。

白禮頓歷史性出戰歐洲賽，今仗作客由加度素帶領嘅馬賽，上半場表現失魂，喺19分鐘同20分鐘嘅90秒內連失2球。白禮頓換邊後醒覺，54分鐘三苫薫助攻柏斯高哥斯追番1粒，完場前2分鐘再博到12碼，由祖奧柏度操刀追成2比2，逃過分組賽2連敗厄運，呢1分亦係白禮頓史上歐戰第1分。

B組另一場，AEK雅典主場1比1和阿積士，AEK雅典2戰4分排榜首，阿積士同馬賽都有2分，而白禮頓就1分墊底。白禮頓領隊迪薩比賽後表示：「我哋踢得唔好，展示唔到球隊嘅實力，同足球有時係踢決心、激情，我為球員感到驕傲，佢哋落後2球嘅反應冇得頂。」