英格蘭點兵惹爭議　禾特普斯落選寸爆修夫基

英格蘭周四(5日)公布新一期國家隊名單，26人大軍依然係熟口熟面，哈利馬古尼、加雲菲臘斯2位「鐵膽」仍然在列，阿仙奴翼鋒布卡約沙卡亦帶傷入選，不過最令球迷不滿嘅係，季初狀態大勇嘅禾特普斯繼續被忽視，呢位韋斯咸中場亦忍唔住寸爆修夫基！

修夫基經常被批評偏愛個別球員，喺曼聯長居後備嘅哈利馬古尼入選已成定律，球迷都被逼接受，但今次中場點兵就有好大爭議，今季英超只上陣70分鐘嘅加雲菲臘斯繼續入選，已轉戰沙特嘅佐敦軒達臣亦順利上榜，反而開季8場有2入波同6助攻嘅禾特普斯名落孫山。

禾特普斯周五(6日)歐霸盃再交助攻，賽後亦忍唔住寸爆修夫基：「我的確好失望(落選英格蘭)，但球員可以控制到嘅，就係踢出國家隊嘅水平，上陣時間亦非常重要，我依家兩樣(表現、上陣時間)都有，我覺得自己可以入選，可惜事與願違。」英格蘭今個月先喺熱身賽對澳洲，之後再喺歐國外主場大戰意大利。