意大利公布名單　34歲老將相隔3年再入選

意大利國家隊公布出戰嚟緊2場歐國盃外圍賽嘅大軍名單，最令人意外係34歲中場邦拿雲度拉，相隔3年再度入選，另外熱刺20歲左後衞烏杜治首次晉身意軍大國腳。

意大利主帥史巴列堤今次揀選人腳變動唔大，但由於隊長射手恩莫比尼受傷，改為選入2位前鋒施卡馬卡、摩斯堅恩，但棄用阿根廷歸化兵列迪古。

中場方面，羅馬中場羅倫素柏歷堅尼上仗歐霸盃受傷，史巴列堤徵召費倫天拿老將邦拿雲度拉，呢位中場僅為意大利上陣15次，對上1次入選已經係2020年10月，但佢今季表現出色，踢5場意甲入3球及2次助攻，成功吸引史帥注意。

意大利將於10月15日凌晨歐國外主場對北馬其頓，3日之後作客英格蘭，呢2場波對於意大利而言都係爭出線生死戰。