曼市雙雄搶三笘薰　白禮頓急續約

冬季轉會窗仲有一段時間重開，英超各隊都開始尋找獵物，西班牙傳媒爆料，曼市雙雄曼城同曼聯都睇中白禮頓日本國腳三笘薰，準備明年1月出手，白禮頓深知「三球王」價值，日前急急同佢傾加薪續約，萬一遭挖角都能賣個好價錢。

西班牙《Fichajes》報道，曼城同曼聯均密切注視三笘薰動向，「藍月亮」需要繼續補充人腳，哥迪奧拿認為三笘薰可取代已離隊嘅馬列斯，至於曼聯將會放棄查頓辛祖，正物色新翼鋒，三笘薰係目標之一，同時又對費達歷高基艾沙同基拿比有興趣。

面對豪門挖角，白禮頓可謂經驗豐富，三笘薰仲有兩年半合約，即時同佢傾續約5年，周薪加到8萬鎊(約76.7萬港元)。報道指，三笘薰希望留在白禮頓，但佢係哥迪奧拿球迷，如果離隊首選去曼城。