舒米高狠批奧拿拿：佢令全隊感到好不安

曼聯喺英超補時奇迹反勝賓福特2比1，但門將奧拿拿表現仍然備受批評，紅魔鬼殿堂級鋼門舒米高直斥呢位後輩唔識撲救，令全隊上下感到好不安。

賓福特中場馬菲亞斯贊臣26分鐘起腳射門，威脅並唔大，但奧拿拿落地比較慢導致失波，賽後舒米高話：「曼聯今場贏波同奧拿拿冇關係，佢只係識上下擋波，作為門將平時練習都要撲波，而唔係上下揮手。曼聯喺歐聯對拜仁慕尼黑，已經睇到奧拿拿有呢種毛病，只係舉起雙手，冇真正去撲救，我真係唔明佢點解會咁做，佢必須做好準備，否則會繼續犯錯，現時曼聯上下感到不安，更加唔信任奧拿拿。」

此外，舒米高認為奧拿拿可能壓力太大，建議佢應該集中精神，專心比賽已經足夠。