沙拿省兩粒都冇用　利物浦被白禮頓逼和

周日(8日)英超頭場焦點戰，利物浦雖有王牌穆罕默德沙拿短時間內梅開二度，但作客仍被白禮頓逼和2比2，連續2仗聯賽不勝。

賽前期待嘅「日本打吡」正選未有出現，白禮頓雖然派出「三球王」三笘薰擔正，但另一邊廂嘅利物浦只讓中場遠藤航先任後備，在加普受傷情況下，以穆罕默德沙拿、達雲紐尼斯同路易斯迪亞斯三箭齊發。

白禮頓藉地利一開波即採取主動，20分鐘阿迪加截到倒戈嘅阿歷斯麥亞里士打個波立即放冷箭，令紅軍門將艾利臣比加束手就擒。40分鐘三箭一次美妙配合，最終達雲紐尼斯妙傳沙拿扳平，完半場前白禮頓門將華布根傳波畀柏斯高哥斯到喉唔到肺，畀殺入禁區嘅蘇保斯拉爾打截到，柏斯高哥斯惟有犯天條被罰12碼，沙拿操刀一針見血，協助紅軍反先2比1。

下半場白禮頓壓前反撲，反而畀利物浦更多打反擊機會，蘇保斯拉爾右路橫傳，賴恩格雲貝治面對空門竟射中楣，錯失拉開紀錄良機。去到78分鐘，白禮頓嘅蘇利馬治於左路罰球傳中，李維士鄧克攝到靚位扳平，之後得勢不饒人，阿迪加右路靚交，空晒嘅祖奧柏度撞射卻高出，最終和氣收場。