一齊癲！基奧特入意甲最佳陣容...做龍門

AC米蘭前鋒基奧特上場聯賽客串守龍，完場前作出關鍵撲救成為贏波英雄，賽後AC米蘭官網亦將佢「轉移」去門將行列致敬，估唔到連意甲賽會都陪佢哋癲，日前公布上周意甲最佳陣容，基奧特竟然以門將身份入選！

AC米蘭1比0贏熱拿亞一仗，門將邁治蘭喺98分鐘被逐，基奧特只係客串幾分鐘，已經作出精彩撲救幫球隊贏波。意甲周一(9日)公布每周最佳陣容，基奧特就成為AC米蘭唯一入選球員，箭頭位置由羅馬前鋒盧卡古贏出。

對於意甲賽會呢個做法，雖然係夠晒噱頭，不過唔少球迷覺得作為官方機構，咁樣「玩嘢」係會削弱公信力，亦係對其他意甲門將嘅不敬。