救星到　18歲挪威天才可幫夏蘭特破入球荒

挪威將於周五(13日)凌晨歐國盃外圍賽作客塞浦路斯，關乎球隊出線命運，但首席射手艾寧夏蘭特腳風唔順，近3場比賽都食白果。幸好挪威人才輩出，18歲新星紐沙今年晉身大國腳後，2次上陣都創造入波，今仗隨時再次助攻艾寧夏蘭特建功。

現時效力比甲勁旅布魯日嘅紐沙，個人技術出眾，有「挪威尼馬」之稱，佢今年9月首次晉身大國腳，立即有佳作，第1次上陣就入1球及1次助攻，幫挪威大勝約旦6比0，跟住上仗歐國外，佢分別傳畀艾寧夏蘭特、馬田奧迪加特入波，以2比1擊敗格魯吉亞，換言之紐沙2次為挪威披甲，已經創造4球，包括入1球及3次助攻，非常犀利。

擁有尼日利亞血統嘅紐沙早於上年9月歐聯分組賽已打出名堂，射入波圖大門，協助布魯日大勝4比0，成為歐聯史上最年輕首次上陣入波球員，今年1月傳出曼城主帥哥迪奧拿有意簽入佢，話唔定不久將來，紐沙可以喺「藍月亮」同夏蘭特合作。