「英愛」獲2028歐國盃主辦權　英格蘭捧盃機會來了

歐洲足協正式宣布，英國及愛爾蘭獲得2028年歐國盃決賽周主辦權，4強及決賽將於倫敦溫布萊球場舉行，英格蘭2年前歐國盃決賽，喺呢個球場互射12碼不敵意大利，始終未能打破超過半世紀錦標荒，5年後將再次有主場之利，奪冠機會來了。

英格蘭曾於1996年主辦歐國盃，上屆亦獲得部份賽事主辦權，今次再搞搞新意思，以英國名義，聯同愛爾蘭合辦2028年歐國盃，所以比賽場地，除咗有英格蘭地區嘅溫布萊球場、曼城球場、聖占士公園球場之外，仲會喺蘇格蘭、威爾斯、北愛爾蘭舉行比賽，其中揭幕戰將於威爾斯卡迪夫千禧球場舉行。

值得一提，由於主辦地方涉及歐洲足協5個獨立成員，包括英格蘭、愛爾蘭、蘇格蘭、威爾斯、北愛爾蘭，呢5支國家隊是否直入決賽周，仍然未有定案。不過，英國傳媒指英格蘭傾向參加外圍賽，藉以保持比賽狀態，呢支「英倫大哥」對於出線信心爆棚。

另外，歐洲足協亦宣布，意大利同土耳其將合辦2032年歐國盃決賽周。