紅軍雙中堅暗戰　干拿迪：我要超越VVD

荷蘭同法國將於周六(14日)凌晨歐國盃外圍賽B組交鋒，雙方利物浦中堅華基爾雲迪積克(VVD)、伊巴希馬干拿迪由隊友變成對手，賽前干拿迪冇面畀，揚言自己目標就係超越VVD，仲話以紅軍「仇家」沙治奧拉莫斯為學習榜樣，呢位24歲法國國腳似乎完全唔怕得罪紅軍球迷。

伊巴希馬干拿迪2年前由RB萊比錫加盟利物浦，被視為華基爾雲迪積克嘅接班人，佢同呢位拍檔交鋒前話：「好少後衞可以做到雲迪積克嘅事情，佢係一位非常出色嘅中堅，我喺佢身上學到好多嘢，現時我嘅目標係變得比佢更出色，另外，我一直有留意沙治奧拉莫斯踢波，佢係我第一個學習榜首。」眾所周知，沙治奧拉莫斯以踢法粗野見稱，包括2018年歐聯決賽整傷利物浦前鋒穆罕默德沙拿，伊巴希馬干拿迪竟然視佢為偶像，小心「傷害」利物浦球迷感情。

法國領隊迪甘斯以往唔多喜歡用伊巴希馬干拿迪，但由於威廉沙列巴、烏柏美卡奴等中堅受傷落選，干拿迪有望擔正鬥荷蘭，趁機證明身價。