【官宣】安祖斯唐辛加盟盧頓　因為住得近

英超球會盧頓周四(12日)宣布，球會同自由身球員安祖斯唐辛簽約3個月，希望借助呢位32歲中場嘅經驗幫球隊護級。安祖斯唐辛加盟後表示，一早已經留意盧頓嘅比賽，因為佢住嘅地方同盧頓非常近。

曾效力熱刺、紐卡素同水晶宮嘅安祖斯唐辛，夏天離開愛華頓後一直處於自由身，佢加盟盧頓後表示：「我屋企同盧頓只有20至25分鐘距離，所以一直留意佢哋喺英冠嘅表現，冇諗過真係有機會着盧頓波衫，好榮幸可以代表盧頓踢英超，希望可以盡量幫球隊搶多啲分數。」

安祖斯唐辛上年因膝部韌帶重傷長抖，自2022年3月後已經未有比賽，不過盧頓領隊艾華斯對佢仍好有信心：「安祖斯唐辛態度一流，有佢跟住球隊每日訓練，陣中年輕球員肯定獲益良多。」盧頓今季升上英超後，目前8戰只得4分排喺聯賽榜尾4。