約隊友食飯　迪基亞有望1月重返英超

迪基亞近日重返曼徹斯特市，被傳媒連日追縱，入場睇曼聯女足，又約曼聯同鄉利古朗食飯，同埋處理佢喺曼市住宅事務，雖然球迷都希望佢重投「紅魔鬼」，但事實係佢有機會加盟另一英超球隊韋斯咸，據報「錘仔」將向迪基亞提供一份18個月合約，明年1月加盟。

呢位上季英超金手套離開曼聯後未有班落，依家仲係自由身，日前喺曼市現身引起紅魔球迷哄動，希望佢歸隊頂替表現差劣嘅奧拿拿，傳媒全程報道迪基亞行縱，入場睇女足，又見佢上載同利古朗食飯嘅相，當日利古朗轉投曼聯，迪基亞有畀意見，勢估唔到利古朗加盟，迪基亞反而冇得留低。

英國《Football Transfers》報道，韋斯咸計劃明年1月簽入迪基亞，簽約18個月，報道指該隊一號門將艾路拿收到沙特報價，打算明年1月去搵真銀，二號門將法比安斯基則不滿長居後備，萌生去意，莫耶斯急需物色門將，加上韋斯咸係踢穩守突擊，唔需要守門員上腳，迪基亞係理想人選。