蘇格蘭吞西班牙2蛋　羅拔臣受傷紅軍頭痕

周五(13日)凌晨歐國外A組賽事，榜首蘇格蘭作客0比2不敵西班牙，出線暫時Hold住，最慘係左閘安德魯羅拔臣喺比賽中勇戰受傷，膊頭疑似甩骹提前退隊，利物浦下場聯賽對愛華頓嘅「默西賽德郡打吡」上陣成疑。

蘇格蘭賽前5戰全勝形勢大好，今場作客擺鐵桶陣死守，令西班牙束手無策。完半場前蘇格蘭被逼換人，安德魯羅拔臣同西班牙門將烏尼西蒙相撞倒地，右邊膊頭疑似甩骹要紮住離場。蘇格蘭頂到後段終於失守，艾華路莫拉達73分鐘為西班牙打破僵局，首次上陣嘅奧漢辛斯特完場前4分鐘再入一球，鎖定2比0勝局。

蘇格蘭領隊奇勒賽後表示：「安德魯羅拔臣會返去利物浦，等佢痛楚緩和之後再檢查，希望佢盡快為球會上陣，然後11月再為蘇格蘭候命。」安德魯羅拔臣會缺席蘇格蘭下周三(18日)對法國嘅熱身賽，利物浦下周六(21日)英超對愛華頓亦上陣成疑。