辛祖尋求外借　決心同坦哈格鬥長命

自從爆出將帥不和，曼聯打算冬窗期間出售查頓辛祖，不過球員唔係咁諗，據報查頓辛祖只想外借，唔打算轉會，因為佢覺得坦哈格唔會留喺曼聯好耐。

英國《FootballTransfers》報道，現時被逐出一隊嘅查頓辛祖，必須向坦哈格及全隊道歉，先可以重返一隊，但查頓辛祖則堅信，自己留喺曼聯嘅時間一定比坦哈格耐，因此正尋求冬窗外借機會，祖雲達斯同多蒙特都有意借用。

報道指，查頓辛祖希望透過外借，令自己保持比賽，繼續留喺修夫基嘅視線範圍，而最理想情況係坦哈格被炒魷，佢就可以喺來季重返曼聯，同新領隊合作。

事實上查頓辛祖喺曼聯內部得到有唔少支持，工作人員對佢評價正面，而佢同曼聯合約至2026年完結，周薪約為30萬鎊(約286萬港元)。