賽制漏洞　愛爾蘭想出線要輸畀荷蘭！

歐國盃出線權競爭激烈，而且改制後出線條件變得複雜，B組更加出現奇怪一幕，已經無緣直接出線嘅愛爾蘭，如果想保住踢附加賽嘅一線希望，下月作客荷蘭竟然要「輸波」先可增加出線機會。

周二(17日)凌晨B組賽事完結，荷蘭憑華基爾雲迪積克12碼絕殺，作客1比0擊敗希臘，以較佳對賽成績壓倒踢多場嘅希臘升上第2位，出線形勢大好。至於愛爾蘭作客4比0大勝直布羅陀，小組得6分排尾2，想出線要指望拎到附加賽資格。

今屆歐國盃有3個附加賽出線席位，分別安排畀歐國聯嘅A級、B級、C級聯賽球隊，每個級別嘅4支排名最高、但未能直接出線球隊，會獲得附加賽資格。最混亂嘅係，當A級聯賽多數球隊已經直接出線，未出線球隊「唔夠4隊」下，會將資格轉移畀其他級別，亦係漏洞出現地方。

愛爾蘭依家喺歐國聯排名第26位，如果要踢附加賽，前面未能直接出線球隊唔可以多過6隊，如果荷蘭最終被希臘爬頭，就會霸佔其中一個名額，所以荷蘭直接出線，對愛爾蘭係最好嘅結果，意味愛爾蘭下月作客荷蘭，出現「輸波有着數」嘅奇怪情況。