尼馬重傷喊住被抬離場　巴西吞烏拉圭2蛋

周三(18日)朝早世盃外南美洲區賽事，巴西作客烏拉圭慘輸0比2，是非多多嘅王牌球星尼馬完半場前嚴重受傷，要由擔架床抬走，呢位前鋒離開球場嗰陣掩面痛哭，懷疑傷及膝頭韌帶，好可能要缺陣一段長時間。

巴西上場被委內瑞拉逼和後，尼馬曾被球迷掟爆谷發洩，之後又爆出同雲尼斯奧斯祖利亞、李察利臣賽前通宵「夜會名模」事件，不過今場只有李察利臣被貶後備，但面對烏拉圭嚴密布防，幾乎冇製造任何到肉攻勢，42分鐘更被烏拉圭前鋒達雲紐尼斯接應傳中頭槌攻陷。

完半場前一刻，尼馬中場爭波同對手碰撞後，左腳落地擺傷膝頭，佢即時痛苦倒地示意受傷，經軍醫長時間治療後要由擔架床抬走，尼馬神情痛苦兼掩面痛哭；巴西失去主力後，下半場再失1球，最終0比2輸波，今屆外圍賽首嘗敗仗。

巴西隊長卡斯米路賽後表示：「我哋要面對現實，盡快搵出改善表現嘅方法，尼馬嘅傷肯定係嚴重，希望唔係最壞嘅情況。尼馬每次進入狀態都會受傷，實在令人難過。」