龍兄虎弟！比寧咸細佬Good騷打動皇馬

英格蘭新星祖迪比寧咸今季大爆發，正所謂龍兄虎弟，佢細佬祖比比寧咸亦鋒芒初露，呢位18歲中場日前代表英格蘭U19出賽表現出色，據報令現場觀戰嘅皇家馬德里球探非常賞識，唔排除會簽埋佢，兩兄弟喺西甲拍住上！

祖比比寧咸同阿哥一樣踢攻擊中場，而且今夏亦喺祖迪比寧咸加盟皇馬當日，由伯明翰轉投新特蘭。祖比比寧咸今個國際賽期代表英格蘭U19上陣，皇馬亦派出球探睇佢上星期對黑山U19嘅賽事，雖然最終踢成0比0，但着10號波衫嘅祖比比寧咸喺比賽中製造唔少機會，大步推進同交波都好有哥哥影子。

祖比比寧咸英格蘭U19表現精華：https://twitter.com/i/status/1712213238950035666　

據西班牙《國家報》報道，皇馬首席球探卡拉法特對祖比比寧咸嘅演出非常欣賞，呢位西甲班霸亦打算出手搶人。祖比比寧咸依家係新特蘭主力，今季11場英冠聯賽全部正選上陣，有2個入波同1次助攻。