尼日利亞挖角　居迪斯鍾斯踢超霸鷹？

今季喺利物浦漸受重用嘅居迪斯鍾斯，一直未得到英格蘭國家隊垂青，據報尼日利亞足總正力邀居迪斯鍾斯「入籍」，呢位利物浦球星可以透過祖父母獲得尼日利亞籍，佢嘅發言人亦表示唔排除「轉會」可能性。

22歲嘅居迪斯鐘斯今個夏天幫英格蘭贏U21歐國盃冠軍，但至少仍未為大國腳上陣，尼日利亞喺葡萄牙主帥比斯路嘅新方針下，不斷物色有資格代表「超霸鷹」嘅球員加入，前德國青年軍球員佐敦多魯拿加夏最近就答應加入，而居迪斯鐘斯亦係尼日利亞重點挖角目標。

居迪斯鍾斯發言人表示：「佢當然留意到踢尼日利亞嘅可能性，不過佢喺英國長大，之前都冇諗個呢個問題，但將來嘅事冇人可以講實。」