【官宣】拒絕沙特肥約　馬高施華同富咸續約

英超球會富咸正式宣布同領隊馬高施華續約至於2026年夏天，粉碎呢位46歲葡萄牙少帥去沙特阿拉伯掘金嘅傳聞。不過，馬高施華戴定「頭盔」，認為今季英超非常難踢，球隊將以護級為目標。

富咸今季英超9戰僅有3勝2和4負，排第13位，成績未如理想，但會方仍然決定留住馬高施華，佢續約後話：「好開心可以簽新約，因為續約問題已經傾咗一段長時間，雙方都對於繼續合作感到高興，我哋一齊度過2個美好球季，球隊現時目標係繼續留喺英超，一定會努力實現。」

馬高施華2021年夏天成為富咸主帥，協助球隊升上英超，上季排第10位，表現令人驚喜。今年7月傳出沙特球隊吉達艾阿里向馬高施華開出一份2,000萬鎊(約1.9億港元)年薪嘅2年合約，係佢當時人工嘅5倍，並同英超最高薪領隊哥迪奧拿睇齊。

據悉馬高施華嘅經理人同吉達艾阿里嘅代表曾經喺倫敦見面，但並未有下文，結果依家決定同富咸續約。