艾華利斯成功轉型　隨時「逼走」迪布尼

曼城中場大腦奇雲迪布尼自今季首輪英超對般尼受傷後，一直養傷，領隊哥迪奧拿安排前鋒祖利安艾華利斯墮後踢進攻中場，效果理想，令「藍月亮」管理層改變主意，暫緩同奇雲迪布尼傾續約嘅計劃，沙特豪門艾納斯乘虛而入，計劃明夏簽入呢位比利時國腳，同C朗拍住上。

23歲嘅祖利安艾華利斯上季多數擔任射手艾寧夏蘭特嘅副選，今季轉型踢進攻中場後，表現出色，踢9場英超入4球，並有3次助攻，成為隊內進攻王，變相代替奇雲迪布尼以往角色，亦令會方重新考慮同呢位32歲老將續約條款，未必再開出肥約。

奇雲迪布尼仲有1年半合約，周薪高達42.5萬鎊(約403萬港元)，屬於英超打工皇帝，雖然曼城想同佢續約，但可能只提供1年短約，薪酬亦有下調壓力，難免令續約機會減少。因此，盛傳沙特球會趁機高薪邀請奇雲迪布尼，甚至傳出艾納斯已派人接觸迪布尼嘅經理人團隊，商討加盟可能性，至於能否成事，仲要睇奇雲迪布尼同曼城傾續約嘅進度。