莫拉達1傳1射　馬體會6連勝直逼榜首皇馬

周一(30日)凌晨西甲，馬德里體育會憑前鋒艾華路莫拉達貢獻1次助攻及射入1球，主場以2比1擊敗艾拉維斯，取得聯賽6連勝，現時僅落後榜首皇馬3分，由於馬體會踢少1場，好大機會可以後來居上。

由於艾拉維斯只係護級份子，馬體會佔盡上風，上半場26分鐘，艾華路莫拉達妙傳，由中場洛迪高列基美入波打開紀錄，上半場補時，艾華路莫拉達自己亦入1球。艾拉維斯只能夠喺臨完場前破蛋，無阻馬體會全取3分。

馬體會自從9月底擊敗皇馬開始，愈戰愈勇，近6場聯賽全勝，2位前鋒基沙文及艾華路莫拉達狀態大勇，今季聯賽分別已經有7球及6球進帳，球隊後上之勢非常凌厲。

現時西甲出現三強鼎局面，皇馬同基羅納都有28分，馬體會以25分排第3位，但踢少1場，嚟緊好大機會追至同分。