艾斯高鹹魚翻生　有望重返西班牙國家隊

西班牙中場艾斯高年初失業，「量地」半年後夏天加盟貝迪斯，估唔到呢位32歲老將竟然鹹魚翻生，踢出連場高水平表現，有傳佢可能會獲重召入西班牙國家隊，艾斯高亦表明再次披起「狂牛兵團」戰衣係佢嘅夢想。

艾斯高季前簽約貝迪斯，立即成為球隊主力，今季有3入波+2助攻，成為球隊進攻核心，包括上場聯賽絕殺奧沙辛拿。有消息指西班牙領隊富安迪有意重召佢入國家隊，艾斯高表示：「希望我有機會再踢國家隊，呢個係足球員最大成就，我好滿意自己嘅表現，入選國家隊係要睇球場上嘅演出，如果真係得到回報，我會好開心。」

艾斯高同貝迪斯簽約至2025年夏天，如果佢單季上陣達到25場或以上，合約會自動延長多1年，同時會生效1,000萬歐元(約8,300萬港元)買斷條款，相信會有唔少球會打佢主意。