阿仙奴出埋局　英聯盃8強抽籤熱門互撼

今屆英聯盃有多支名牌提早出局，熱刺喺第2圈畢業，曼城喺第3圈被紐卡素淘汰，曼聯同阿仙奴周四(2日)亦喺第4圈輸波出局，隨即舉行嘅8強抽籤繼續「命運弄人」，4支熱門球隊互撼，包括利物浦主場對韋斯咸，紐卡素就作客車路士。

除曼聯慘敗紐卡素腳下外，第4圈阿仙奴作客韋斯咸同樣倒灶，收起半隊主力嘅阿仙奴上半場因賓韋特擺烏龍落後，下半場韋斯咸再由古達斯同查洛保雲入波領先3比0，「兵工廠」尾段憑後備上陣嘅馬田奧迪加特破蛋，但仍輸1比3出局。

韋斯咸晉級後，8強抽中對利物浦，至於紐卡素就繼續「地獄之旅」，對上2圈先後淘汰曼城同曼聯後，8強再作客硬撼車路士。另外2場賽事為愛華頓主場對富咸，以及英甲嘅維爾港對英冠嘅米杜士堡。