勁過賴斯　富安健洋當選阿仙奴10月最佳球員

阿仙奴公布，後衞富安健洋當選球隊10月最佳球員，表現搶鏡過「億元先生」迪格蘭賴斯，亦係呢位日本國腳自2021年9月之後，相隔2年再次獲此殊榮，成為佢周日(5日)25歲生日嘅最佳禮物。

富安健洋獲得64%選票，力壓迪格蘭賴斯、加比爾捷西斯、布卡約沙卡，獲得呢個獎項。能夠勝任中堅及左右二閘嘅富安健洋10月為阿仙奴上陣5次，協助球隊取得3勝1和1負，其中英超大戰曼城，佢最後15分鐘上陣，發揮重要作用，有份策動攻勢，協助加比爾馬天尼利射入致勝1球。

此外，富安健洋對錫菲聯，取得加盟阿仙奴近2年半以來首個入球，愈踢愈有信心，領隊阿迪達大讚呢位亞洲球星鬥心強，並且係隊內最受歡迎球員，可見佢人緣極佳。富安健洋過往只屬於副選，今季備受重用，近2場歐聯更加以正選身份踢足全場，加上今次攞獎，前途一片光明。