拜仁再受打擊　迪歷特受傷或緣盡今年賽事

德甲豪門拜仁慕尼黑上仗德國盃大熱倒灶，不敵丙組仔沙貝魯根之外，更加有主力受傷。根據德國《圖片報》報道，拜仁中堅馬菲斯迪歷特整傷右膝內側韌帶，估計需要休息6星期，由於德甲踢到12月20日就會歇冬，意味呢位荷蘭國腳可能緣盡今年餘下賽事。

馬菲斯迪歷特上仗踢咗25分鐘，就受傷退下火線，經過詳細檢查之後，證實佢右膝內側韌帶有撕裂情況，起碼要抖6星期，包括缺陣周日(5日)凌晨德甲作客勁敵多蒙特。

其實馬菲斯迪歷特今季已經唔係第一次整傷膝部，佢喺9月對波琴，亦因為膝傷提早離場，並缺陣1個月，直至10月22日先至復出，好不幸踢咗4場比賽又再次受傷。加上另一位中堅烏柏美卡奴亦有傷在身，教練杜曹肯定好頭痛。