天亡坦哈格　馬天尼斯要第二次開刀

曼聯阿根廷中堅利辛度馬天尼斯自從9月再度受傷，隊波都未好過，消息指呢位坦哈格「契仔」將會接受第二次跖骨手術，如無意外將會錯過今年所有賽事，最快明年復出。

利辛度馬天尼斯上季以5,700萬鎊(約5.4億港元)由阿積士轉投曼聯，迅速成為後防重心，但好不幸喺今年4月對西維爾受傷，跖骨骨折，開刀後於今季復出，但9月舊傷復發，對拜仁慕尼黑後已經再無上陣，將要再度開刀。

《曼徹斯特晚報》報道，利辛度馬天尼斯將接受第二次手術，佢話：「我正在慢慢康復，我已經第2次遇到呢個傷患，必須保持耐心。」不過佢等得，坦哈格唔等得，或者當佢復出之日，佢「契爺」坦哈格都炒咗咯。