尼馬完成手術　長抖10個月

巴西足總宣布，上月世界盃外圍賽對烏拉圭一役受傷嘅尼馬，已於當地時間周四(2日)完成左膝十字韌帶及半月板手術，過程非常成功，巴西傳媒指呢位31歲前鋒將會缺陣10個月，無緣明年6月舉行嘅美洲國家盃。

尼馬近年經常受傷患問題困擾，今年2月因為足踝受傷，休息130日，8月中由巴黎聖日耳門(PSG)轉投沙特阿拉伯球隊希拉爾後，立即因傷缺陣季初賽事，9月中復出後，僅過1個月又再次受傷。根據西班牙《阿斯報》統計，尼馬職業生涯原本已經因傷累積休戰近1000日，錯失近200場比賽，加上今次長抖，呢兩項數將會繼續增加。

尼馬養傷之下，巴西國家隊固然受影響，但最傷都係希拉爾，呢支沙特豪門斥資9,500萬美元(約7.4億港元)向PSG收購尼馬，並提供1份總值3億美元(約23.5億港元)薪酬嘅2年合約，但尼馬僅為希拉爾上陣5次入1球及2次助攻就長抖，以目前情況睇，恐怕希拉爾有一半花費係「倒落海」。