洛迪高高斯續約至2028　毀約金10億歐元

皇馬正式宣布同前鋒洛迪高高斯續約至2028年，毀約金提升至10億歐元(約83億港元)，加上早前已經續約嘅雲尼斯奧斯祖利亞至2027年，意味「銀河艦隊」未來4至5年鋒線將由呢2位「00後」巴西國腳擔大旗。

現年22歲嘅洛迪高高斯4年前由巴西球隊山度士加盟皇馬，至今上陣179次，射入39球及33次助攻，本身踢翼鋒出線嘅洛迪高高斯技術非常全面，亦可以勝任前鋒，成功填補射手賓施馬離隊之後嘅位置，將影響減至最低，所以就算佢仲有2年半合約在身，皇馬仍然決定同洛迪高高斯續長約。

皇馬正處於新舊交接時期，除咗賓施馬今夏離隊之外，2位中場老將莫迪歷、卻奧斯亦可能明夏走人，會方積極同新一代主力傾續約，預料短期之內會同2位中場卡馬雲加、費達歷高華維迪續約。