般奴補時絕殺　曼聯險勝富咸

周六(4日)英超早場，備受壓力嘅曼聯作客富咸，憑般奴費南迪斯補時絕殺，險勝1比0全取3分，曼聯今場贏來有運，但哈利馬古尼撞親個頭都搏到尾，都算係咁。

曼聯今仗變陣，消息話拉舒福特受傷被收起，改用阿歷真度加拿祖，後防有雲比沙卡復出，但華拉尼仲未好番，要用莊尼尹雲斯拍哈利馬古尼，富咸就有安達斯彭利拿倒戈，韋利安同伊禾比雙翼齊飛。

比賽初段哈利馬古尼就撞親個頭，經治療後冇乜事，但就因為佢喺8分鐘一次死球攻勢，掂唔到波但又有參與進攻，結果球證睇完VAR判佢越位，搞到麥湯米尼入波被判詐胡，連累曼聯未能早段領先，半場互無紀錄。

下半場曼聯攻勢疲弱，而且哈利馬古尼又見頭暈，59分鐘出場治理，之後繼續堅持比賽，反而65分鐘坦哈格換走毫無表現嘅「契仔」安東尼馬菲奧斯，反觀富咸攻勢旺盛，韋利安三番四次施射，好在奧拿拿頂得住。

去到完場補時，富咸遲遲解唔到圍，為曼聯第200場上陣嘅般奴費南迪斯禁區頂射個3分波，為曼聯奠勝。