杜古大爆發！1入波+4助攻率曼城大勝

曼城周六(4日)英超再顯王者本色！憑住比利時翼鋒謝利美杜古交出1入波+4助攻，曼城主場以6比1狂數般尼茅夫，領隊哥迪奧拿大讚佢係球壇罕有嘅「扭波王」。

曼城今場圍攻般尼茅夫，謝利美杜古30分鐘先開紀錄，佢之後不斷用扭波同走位製造攻勢，完半場前兩度助攻貝拿度施華同文路爾艾簡治入波。弗爆嘅謝利美杜古收唔到油，64分鐘再妙傳菲爾科頓射入，般尼茅夫74分鐘破蛋，但謝利美杜古83分鐘後場交出長直線畀貝拿度施華單刀射入，食出助攻「大四喜」，加上尼敦阿基完場前2分鐘埋齋，協助曼城狂數6比1。

哥迪奧拿賽後表示：「唔止今場，杜古今季每場波都有出色表現，令所有人都驚訝。明顯杜古喺禁區附近威力好大，今時今日好難搵到一個球員，可以好似佢咁喺狹窄範圍內扭波，而且佢喺頭5米嘅爆發力係世界最快之一，就算佢冇機會扭波，佢做嘅決定都係正確，呢個係佢成為偉大球員嘅原因。」