紐卡素「賭輸」　積及梅菲做手術抖3個月

紐卡素今季出戰歐聯，連場硬仗下出現唔少傷兵，前鋒積及梅菲喺上月底歐聯膊頭甩骹，不過領隊艾迪侯域就決定「賭一鋪」，要佢喺周日(5日)英超對阿仙奴上陣，結果積及梅菲再次甩骹，將會進行手術根治，預計要休戰3個月時間。

積及梅菲喺上場歐聯對多蒙特受傷，膊頭甩骹後只係抖咗10日就復出，結果對阿仙奴後備落場踢16分鐘，就喺一次心口控波動作再度甩骹。艾迪侯域表示：「我哋知道積及梅菲有機會再次甩骹，亦有機會平安過關，好可惜依家佢似乎再甩骹，手術係唯一方法，我估計佢要抖3個月，對球隊係一大打擊。」

紐卡素喺對阿仙奴一戰仲有左閘丹般恩受傷，加上原本有阿歷山大伊沙克、哈維班尼斯同保治文等傷兵，而意大利中場辛度東拿利又因非法賭波要長期停賽，令紐卡素變陣空間大大減少。