馬體會狂派6蛋　施蒙尼創造神級紀錄

周三(8日)凌晨歐聯E組出現驚人賽果，馬德里體育會主場以6比0大勝些路迪，升上榜首，出線形勢大好。馬體會主帥施蒙尼更加創下一項神級紀錄，成為歐聯史上取得最大勝仗嘅非歐洲教練，證明呢位阿根廷名帥並非只識「防反戰術」。

馬體會上輪歐聯作客僅逼和同組最弱嘅些路迪2比2，表現備受批評，今仗返回自己地頭，不敢再怠慢，開賽6分鐘就由基沙文勁射入網打開紀錄，上半場補時，艾華路莫拉達近門剷入成2比0。

換邊之後，馬體會攻勢更加凌厲，基沙文、艾華路莫拉達各自再入1球，同樣梅開二度，加上2位後備上陣球員森美爾連奴、沙奧尼古斯都取得入球，狂贈些路迪6蛋。

同組另1場，拉素憑恩莫比尼入波，主場以1比0擊敗飛燕諾，有7分在手升上第2位，落後馬體會1分，飛燕諾以6分排第3位，呢3隊為2個出線名額爭崩頭。