比比破歐聯最老入波紀錄　背後有個暖心故事

周三(8日)凌晨歐聯H組，波圖主場以2比0擊敗安特衛普，中堅比比補時入波，以40歲零256日成為歐聯史上最大年齡入波球員，皆因賽前佢答應媽媽，要取得入球送畀對方作為生日禮物。

波圖上半場32分鐘，由前鋒法蘭斯高艾雲尼臣射入12碼打開紀錄，戰至補時1分鐘，波圖開出短角球組織攻勢，比比接應右路傳中頂入，鎖定2比0勝局。波圖4戰取得3勝1負，同巴塞隆拿都係有9分在手，領先第3位薩克達3分。

賽後比比話：「首先，今日係1個特別日子，係我媽媽生日，我同佢講過，要入波送畀佢，來到我呢個年紀，仲可以踢歐聯，實在不可思議，要勤力作出奉獻、對足球有熱誠，我每日都為波圖付出所有。」

比比曾經效力皇馬10季，捧過3次歐聯冠軍，其後轉投土耳其球隊比錫達斯，2019月1月重返波圖，一直效力至今，佢今季上陣8次，來到今場終於開齋。