荷蘭宣布格雲貝治「解凍」　有望重返國家隊

荷蘭中場賴恩格雲貝治今季轉投利物浦後，表現穩步上揚，佢之前因為拒絕荷蘭U21徵召而被足總「封殺」，不過荷蘭領隊朗奴高文日前證實封殺令已經解除，呢位21歲中場如果可以繼續有好表現，重返荷蘭國家隊指日可待。

賴恩格雲貝治喺9月份拒絕荷蘭U21徵召，被朗奴高文等公開批評兼「封殺」，不過朗奴高文近日轉口風：「呢件事(拒絕徵召)已經完結，我明白佢嘅原因，但呢個行為點都要受罰。如果佢繼續依家嘅進步，佢會再返國家隊，我哋就嚟出線歐國盃，格雲貝治絕對係我哋重點考察球員之一。」

賴恩格雲貝治今季已喺12場賽事上陣，當中有7場係正選，正選上陣次數已經多過佢上季效力拜仁慕尼黑嘅數字，而且已有2個入波同1次助攻。利物浦領隊高普早前表示：「賴恩格雲貝治係個好好嘅球員，更加好嘅係，佢仲有好大嘅進步空間。」