莊尼伊雲斯受傷　馬古尼隨時「打回原形」

曼聯今季防守錯漏百出，防線傷兵滿營下，領隊坦哈格最近先試出最可靠嘅中堅組合，可惜近期獲器重嘅老將莊尼伊雲斯，喺歐聯對哥本哈根只係踢15分鐘就傷出，令球隊被逼要再用華拉尼+哈利馬古尼嘅組合，令人擔心近期翻生嘅馬古尼會「打回原形」。

今仗係35歲嘅莊尼伊雲斯，相隔10年後再為曼聯出戰歐聯，可惜呢位北愛爾蘭國腳早段疑似大腿拉傷，15分鐘就退下火線由華拉尼入替，加入勞基梳爾、利辛度馬天尼斯等後防「十字兵」行列，最慘係佢同馬古尼嘅合作最近先至穩定，依家又要推倒重來。

由於馬古尼同華拉尼都係擅長踢右中堅，合作踢雙中堅效果差勁，坦哈格最近就將左中堅重任交畀莊尼伊雲斯，連帶馬古尼亦有「翻生」表現，如果莊尼伊雲斯要缺陣一段時間，馬古尼好可能要踢番經常「出事」嘅左中堅，隨時成為計時炸彈。