Kepa受傷抖3周　皇馬或加入爭奪迪基亞

皇馬今季門將位置連接出事，繼正選鋼門泰拔高圖爾斯長抖之後，向車路士借用嘅門將阿列沙巴拿加(Kepa)近日亦受傷，西班牙傳媒指佢可能需要休息3星期，因而傳出「銀河艦隊」可能加入爭奪自由身嘅前曼聯門將迪基亞。

根據皇馬官方透露，阿列沙巴拿加右腳大腿肌肉受傷，幾時可以復出，仍然有待觀察，西班牙傳媒估計Kepa將會抖3星期。皇馬上場歐聯對布拉加，由3號門將盧連把關，佢救出1球12碼，表現唔錯，但如果呢位烏克蘭國腳有乜三長兩短，「銀河艦隊」隨時有「滅門」危機，有迫切性簽入門將。

迪基亞本身喺馬德里成長，並效力過馬體會，無疑係「即食」最佳人選，盛傳另1支西甲球隊貝迪斯都想簽佢，但論財力及球會規模，皇馬遠勝一籌，吸引迪基亞加盟有優勢。