狼隊奇迹絕殺　熱刺殘陣2連敗

周六晚(11日)英超早場，陣容天殘地缺嘅熱刺雖憑比蘭莊臣開賽3分鐘開紀錄，但守到尾段突然崩潰，狼隊補時連下兩城反勝2比1，熱刺2連敗再受打擊。

熱刺上仗輸畀車路士後，有兩人停賽同多人受傷，常規正選冇咗5個，雙中堅要用艾歷迪亞賓戴維斯，中場賀積查治都要正選上陣，隊長孫興民同對方狼隊嘅黃喜燦同場對戰合演「南韓打吡」。

熱刺早段打快攻得手，僅3分鐘，古路施夫斯基右路用後腳放落底線，柏度樸路接應傳中，比蘭莊臣門前撞入，熱刺閃電領先1比0。

取得領先嘅熱刺人腳所限，餘下時間無力擴大比數，被狼隊圍攻，攻門浪接浪，33分鐘勒美拿射門但過唔到門將古里莫維卡里奧十指關。

下半場初段，狼隊瘋狂錯失扳平機會，馬菲奧斯根夏同黃喜燦齊做大嘥鬼，直至補時風雲色變，91分鐘，後備入替嘅沙拉比亞右腳一控左腳一射終於攻破熱刺大門追成1比1，再喺97分鐘，勒美拿為狼隊取得絕殺入球，奇迹反勝熱刺2比1。