霸氣！麥巴比成法甲千禧後「帽子王」

基利安麥巴比喺周日(12日)凌晨法甲上演「帽子戲法」射入3球，協助巴黎聖日耳門(PSG)作客以3比0大勝蘭斯，取得聯賽5連勝，升上榜首。基利安麥巴比並以8次「帽子戲法」，成為踏入2000年以來，法甲最多次「戴帽」球員。

巴黎聖日耳門上場歐聯輸畀AC米蘭，返到法甲重拾水準，成為麥巴比「個人騷」，開賽3分鐘凌空抽射入網，下半場再入2球。根據《Squawka》統計，由2000年計起，基利安麥巴比以8次「帽子戲法」，超越7次「戴帽」嘅前PSG射手伊巴謙莫域，獨佔法甲「帽子王」美譽，第3位係摩納哥前鋒賓耶達，有5次「帽子戲法」。

此外，麥巴比今季聯賽已入13球，成為自1971/72年球季以來，首位開季前12輪法甲入到13球嘅球員。

不過，賽後PSG教練安歷基仍然唔多滿意麥巴比嘅表現：「我唔係太開心，我認為麥巴比呢種世界頂級球員，應該可以做得更好。」由於尼斯早1日打和蒙彼利埃0比0失分，被PSG搶走榜首之位。