艾達臣因傷退出巴西隊　留力鬥利物浦？

曼城門將艾達臣摩拉斯上場英超對車路士，唔止失4球，更加勇戰受傷，無法為巴西出戰嚟緊2場世界盃外圍賽對哥倫比亞、阿根廷，巴西看守領隊費蘭度迪尼斯已經補選帕拉尼恩斯門將賓圖，填補空缺。

艾達臣摩拉斯上仗踢到比賽末段受傷，頂住痛楚捱到完場，賽後經過軍醫評估，認為佢唔適合出戰國際賽，惟有退出巴西大軍名單。艾達臣摩拉斯退隊之後，意味利物浦門將艾利臣比加將以正選身份出戰11月17日早上世界盃外圍賽作客哥倫比亞，以及5日後主場對阿根廷。

不過，巴西2位後備門將賓圖，以及19歲新星盧卡斯佩利都未曾為國家隊上陣，如果艾利臣比加有乜三長兩短，門將位置肯定成為球隊最弱一環。

值得一提，國際賽期之後，英超將會上演榜首大戰，曼城主場對利物浦，艾達臣摩拉斯可以趁呢段時間休息，反觀艾利臣比加要飽受舟車勞頓之苦，艾達臣今次「及時受傷」似乎對曼城更有利。