出線仲未夠　一個原因英格蘭必須再贏波

英格蘭已經提早取得明年歐國盃決賽周入場券，但領隊修夫基仍然徵召強陣出戰餘下2場外圍賽對馬爾他、北馬其頓，因為「三獅兵團」仲要搶分爭做種子隊，避免同德國等勁旅同組，提升捧盃機會。

歐國盃決賽周分成6組，主辦國德國自動編入A組成為種子隊，另外5隊種子隊根據外圍賽成績決定，葡萄牙8戰8勝有24分在手，肯定成為種子隊，換言之得番4個種子席位未定。

現時斯洛文尼亞、丹麥有19分，法國有18分，比利時有17分，英格蘭、土耳其、羅馬尼亞各有16分，英格蘭贏晒2場，應該好大機會成為種子隊，由於對手馬爾他、北馬其頓實力比較弱，並且已經篤定出局，戰意成疑，「三獅兵團」要全取6分，應該唔難。