唔怕做罪人　佐真奴：我願意再射12碼

意大利將於周六(18日)凌晨歐國盃外圍賽主場對北馬其頓，佐真奴闊別5個月之後，獲得意軍重召，呢位中場上屆世界盃外圍賽2次對瑞士，都射失12碼，成為球隊無緣決賽周嘅罪人。不過，佐真奴揚言，如果領隊史巴列堤安排佢做「劊子手」，佢絕對唔會退縮。

佐真奴對上1次入選意大利名單係今年6月歐國聯，新帥史巴列堤領軍4場比賽以來，呢位巴西裔球員一直被棄用。佐真奴今次可以重返國家隊，好大程度上因為辛度東拿利違規賭波，被罰停賽，騰出空缺。

適逢意大利餘下2場歐國外都係關乎出線嘅生死戰，佐真奴會唔會再主射12碼，備受關注，佢話：「關於過去射失12碼嘅問題，並唔會影響到我，依家急不及待想上陣比賽，如果球隊獲得12碼，而又需要我主射，我絕對唔會退縮，雖然領隊仲未有安排人選，但我已經準備好。」

佐真奴今年1月由車路士轉投阿仙奴，曾被投閒置散，但近期獲得主帥阿迪達重用，佢透露希望將來重返意甲搵食，但現時只會專注為兵工廠爭取佳績。