【有片】朗尼細佬半場笠入　媲美碧咸

去片睇約翰朗尼半場笠入https://twitter.com/i/status/1724811744449888731　

周三(15日)英格蘭非聯賽賽事，馬爾斯菲對巴斯福特聯，出現精彩一幕，馬爾斯菲中場約翰朗尼喺中線位置起腳笠射入網，媲美曼聯球星碧咸1996年射入溫布頓大門嘅經典笠射。約翰朗尼都有「紅魔DNA」，因為佢哥哥就係曼聯史上首席射手朗尼。

當時約翰朗尼喺後場搶到波之後，立即盤球前進，喺中線位置見到對手門將企得太出，於是大腳笠射，精準入網。雖然今場係第7級別聯賽，但約翰朗尼射入超遠距離世界波，亦屬於難能可貴，美中不足係馬爾斯菲最終只能打和1比1。

現年32歲嘅約翰朗尼，球員生涯發展遠不及哥哥朗尼，大部份時間效力低級別聯賽球隊，亦過去美職搵食，踢過紐約紅牛、奧蘭多城，今年8月加盟馬爾斯菲，今仗半場笠入，獲得傳媒廣泛報道，可能係佢球員生涯最威水時刻。