荷蘭17歲天才中堅　1星期坐火箭上位

荷甲名牌阿積士今季沉淪，不過「造星」能力仍然有保證，17歲中堅夏圖今季獲重點栽培，上周日(12日)成為阿積士史上最年輕隊長，周中隨即獲選入荷蘭國家隊，周日(19日)凌晨對愛爾蘭有望為荷蘭處子披甲，極速上位。

雖然年僅17歲，但夏圖今季每場聯賽都正選上陣，上場聯賽對阿梅爾城更喺貝雲積被換走後接任隊長，以17歲250日之齡成為阿積士史上最年輕隊長。由於2名中堅雲迪尹同馬菲斯迪歷特受傷，荷蘭領隊朗奴高文日前更徵召夏圖入國家隊，準備2場歐國外大戰。

夏圖對於今次入選亦難以置信：「我做緊健身嗰陣，貝雲積就嚟話我入選荷蘭國家隊，我原本以為佢呃我，直到自己睇到先至識笑！所有隊友都走嚟恭喜我，佢哋好似我父母同兄弟一樣，我會做好準備去去迎接挑戰。」