賽馬會菁英盃　冠忠南區贈深水埗4蛋

「賽馬會菁英盃」周日（19日）假九龍灣公園，上演A組賽事，深水埗同冠忠南區爆發地區打吡。結果憑史提芬彭利拿大演帽子戲法，加上川瀨浩太頭槌建功，以4比0擊敗有新帥陳浩然首度督師的深水埗。

陳浩然執掌深水埗帥印後，今場首次帶隊，派出戴延匡、梁羿童及張廣然3位U22球員擔正，鄧子均充當箭頭，隊長顏卓彬、雲尼馬高地域及艾雲馬高域坐鎮中場，宋柱浩與浦敏扼守後防中路；南區3位正選U22分別是伍瑋謙、陳潤潼及趙聡悟，李小恆出任左翼，為射手史提芬彭利拿提供側擊支援。

南區開局就搶得先機，11分鐘，梁羿童禁區內推跌陳凱柏，球證直指12碼點，史提芬彭利拿操刀射入。南區領先後繼續向對手施壓，17分鐘，佐佐木周開出罰球川瀨浩太頭鎚頂高。4分鐘後，陳凱柏開出角球，川瀨浩太尾柱一頂入網，南區拉開比數，半場以2比0領先。

換邊後，深水埗率先換人，由黃琛喆入替有黃牌在身的梁羿童，47分鐘，顏卓彬窄角度一射，考驗不到伍瑋謙。南區好快作出回應，49分鐘，深水埗後防傳球失誤，史提芬彭利拿把握機會一射入網。深水埗嘗試反撲，63分鐘鄧子均禁區內一射，被回防的川瀨浩太擋走，深水埗球員投訴後者犯手球，不過球證就無表示。76分鐘，南區再博到12碼，史提芬彭利拿一蹴而就，完成帽子戲法。最終南區以4比0輕取深水埗，重返勝軌。

南區主教練楊正光就對球隊表現感滿意：「尤其上半場喺邊路創造咗唔少機會，大家走位靈活，如果把握得好啲，優勢可能更大，攞到久違嘅勝仗有助球隊重拾信心，準備下場對傑志嘅聯賽賽事。」羅拔奧度早前與南區分手，楊正光透露是這位尼日利亞前鋒主動提出解約：「佢覺得自己傷情反覆，好番踢完1場膝蓋又再痛，佢都有啲沮喪。」楊正光表示球隊正在物色新兵，希望能夠在前鋒或中堅位置再添人腳。

至於深水埗主教練陳浩然就表示：「大家比賽態度係好過之前幾場波，我哋防守死球要再改善，喺菁英盃我哋一邊畀機會年輕球員，都希望佢哋要有進步。」球隊今場兩度輸12碼，陳浩然認為球證決定值得商榷：「我覺得唔係12碼，但尊重球證決定。」對於球隊目標，陳浩然希望日後球隊發展至有能力與強隊抗衡：「我之前執教大埔及元朗，都贏過好多強隊，我哋目標唔止係贏晉峰或香港U23嗰啲，相信建立到球隊信心同隊形後，對住強隊佢哋都會覺得係有得踢。」