烏克蘭要靠「基羅納神秘力量」翻身

烏克蘭將於周二(21日)凌晨歐國盃外圍賽C組生死戰對意大利，烏克蘭必須贏波先至可以取得直接出線資格，形勢處於下風，呢支東歐球隊要翻身，「基羅納孖寶」成為關鍵人物。

西甲球隊基羅納今季創造童話故事，經過13場聯賽後仍然可以力壓皇馬，巴塞隆拿，排榜首之位，陣中2位烏克蘭國腳杜夫比克、迪斯漢高夫功不可沒。現年26歲前鋒杜夫比克今夏由迪尼普加盟基羅納，迅速融入球隊，踢13場西甲入7球及4次助攻，佢曾於上屆歐國盃16強對瑞典，踢到加時最後一刻射入致勝1球，協助烏克蘭打入8強，今場生死戰有能力再次扮演救世主。

同樣26歲中場迪斯漢高夫今年1月由基輔戴拿模轉投基羅納，雖然佢表現唔及杜夫比克搶眼，但勝在實而不華，今季西甲已入2球及2次助攻。兩人能夠協助基羅納創造奇迹做西甲一哥，或者可以用呢股「神秘力量」幫國家隊打場逆轉勝。